— 21.11.2018 —

Bai Shui Tai

Vo Tina’s Guesthouse am Ändi vom Tiger Leaping Gorge gits es Bussli wo uf Bai Shui Tai (白水台), wörtlech übersetzt Wiss (白) Wasser (水) Terrasse (台), fahrt. Uf dr ganze Fahrt dür grüeni Piniewäuder, über schwindelerregendi Päss und dür unberüehrti Täler heimernis gseit: “Hie söttme eigentlech entweder mitem Töff, em Velo oder z’Fuess düre”. Obwou ds Bussli langsam isch gfahre, hetme fasch nid gnue Zit gha ds Panorama z’gniesse.

Ussicht uf ferni Gipfle
D'Steffi iiquetscht zwüsche zwene Schlafende
D’Steffi ufem Troumplatz

Baishuitai isch es munzigs Dörfli i de Uslöiffer vom Himalaya, ca. 1’500 Kilometer östlech vo Lhasa, öppe 2’300 Meter überem Meer. Weme dert mitem Bus aachunnt, wirdme sofort vo zwone Froue belageret, wo eim i ihrem jewilige Hostel wei ungerbringe. Me het d’Wau zwüschem “Naxi Family Inn” und am “Naxi Family Home” — beidi si immer eis besser aus z’angere. Nach sorgfäutigem Abwäge heimer üs für die Ungerkunft entschide, wo e chli weniger ufdringlech beworbe isch worde.

E Chatz ufem Bänkli vorem Huus wird gstriichelet
… und wius e Chatz het gha

Mir si go d’Sache deponiere u heinis sofort parat gmacht, für d’Houptattraktion i dem Ort ga z’bestune solang no d’Sunne schiint. Es isch nämlech scho fasch haubi vieri gsi und e Teil vom Bärg isch scho im Schatte gläge. Am Iigang hocket überraschenderwiis üsi Gastgäberin wonis vor 10 Minute no grad ds Zimmer zeigt het, tuet aus hättsi nis no nie gseh und wottnis Boumnüss verchouffe. Liecht irritiert lehnemer ab und machenis schlöinigscht dra, die viele Stäge z’erklimme. Mir si praktisch ueche gsecklet und si völlig atemlos aber bi strahlendem Sunneschiin bi de Wisswasser-Terrasse aacho.

Wisswasser-Terrasse
Kristauklars Wasser
Verchauchti Bletter
Wisswasser-Terasse mit Bärge im Hingergrund
Kristauklars Wasser, fantastischi Witsicht

Gmäss dr Legände us dr uraute Dongba Religion vo de Naxi Lüt, hei zwöi Naxi-Götter die Terasse ersteut, um de Lüt z’zeige wie me ds hüglige Gländ füre Ackerbou nutzt. Gmäss am Internet si die Terrasse dür Ablagerige vom sehr kalziumhautige Wasser entstange (langweilig!). Spannend hingäge isch, wie aus wo im Wasser ligt quasi versteineret. D’Bletter wo si drigheit wärde vom Chauch regurächt iigfasst.

Dongba Religion und Naxi Kultur

Uf die sächse hets ir Ungerkunft Znacht gä und ufem Bärg ischs langsam fiister u chaut worde. Zit für nes warms Tee ir guete Stube, müglechscht nach bim Füür. Üsi Gastgäberin het währendem Choche unungerbroche gsunge, geng miteme Lächle uf de Lippe.

Bildbeschrieb
Bildbeschrieb
Bildbeschrieb
Cheibe Chätzer gniessts

Während em köstleche Ässe (Yak-Ragout, öppis wie Rösti, Tomate mit Ei und Riis), het üs d’Pizhen He in gebrochnigem änglisch vo ihrer Kultur und vo ihrem Vater, am letschte läbende Naxi wo no uf die traditionelli Art cha Papier härsteue, verzeut. D’Naxi hei um 200 nach Christus aagfange us Rinde Papier härzsteue. Die Kunst isch meh u meh i Vergässeheit grate, bis 1990 ds Dongba Kultur­forschigs­zänter uf dr Suechi nach Wüssensträger ar Pizhen ihre Vater gfunge het. Gmeinsam mit sire Tochter heter im Huus e chlini Papier­wärchstette ufbout und steut sit meh aus 15 Jahr nach dr traditionelle Methode wieder Papier här. Damit ds Wüsse nid verlore geit, gäbesi Kurse und ungerrichte Schüeler ir Hoffnig uf Nachfouger im Handwärk und ir Dongba Religion.

Es Naxi Papier
Rinde aus Rohmateriau für d'Papierhärstellig
Es Papier und e Huufe Rinde, ds Rohmateriau für d’Papierhärstellig

So si mir unverhofft zumne sehr interessante Iiblick ine fasch vergässeni Kultur cho, nume wiu d’Pizhen bim Bus e chli weniger gliiret het. Ir nächschte Gschicht erfahret dir, wieso dasses e ganz blödi Idee isch gsi, so schnäu zu de Terrasse ueche z’seckle.