Dr Süde

Wüumer enang so guet vertreit hei, heimer a di acht Täg Zentralmongolei no acht Täg Südmongolei aaghänkt. Das hets bruucht, das Land isch riesig (heimer denn dänkt, womer no nid z’China si gsi).

So simer am 21. Oktober i chli abgänderter Formation - d’Uka het zrügg uf UB müesse u mit ihre ischnis dr Chefchoch o grad abhande cho - ab i d’Wüeschti. Nöi drbi aus üse Guide und Choch, d’Zelmong. Si heimer afe churz gseh gha, denn mit de Franzose, wosi hurti zwöi Gläser vo dem Vodka het abegschüttet wo mir vom nume chli drann nippe scho meh aus gnue hei gha.

10 Churzgschichte

O hie gängs z’wit wemer über aus würde brichte, drum e Uswauh vom Wichtigschte:

Flammendi Klippe u gschibleti Feuse 21.10.2017 bis 26.10.2017 - ir Gobi

Dr Süde vor Mongolei isch aus angere ausme vonere Wüeschti würd erwarte, er het landschaftlech so einiges z’biete. Klari Indizie, dassmer ire Wüeschti si, hets zwöi gä: endlosi Witi bis zum Horizont u Kameu. Süsch hets meh Steine u so Steppegwächsartigs — Sand u Düne muessme ga sueche.

Uf zmau trifftme ufnes Hochplateau wosech uf dr einte Site Klippe hei biudet. We die vor untergehende Sunne belüüchtet wärde, erinneresi irgendwie a Grand Canyon. Hie hetme bsungersch viu Dino-Fossilie gfunge.

O di sogenannte Tsagaan Suvraga (White Stupas) het dr Wind über tuusegi vo Jahr gformt - e iidrücklechi Landschaft. Genauso wi di viele Granitformatione wo usgseh wines guets Schwizer Ruuchbrot wome het i Schibe gschnitte. Si hätte di perfekti Grössi fürne guete Honig-Ankebock. (Gwüssi Entzugserschiinige machesech langsam aber sicher bemerkbar).

Dassme i au dene Landschafte ohni jeglichi Restriktione wis eim grad passt het chönne umechräsme, het bi üs Entzücke und Entsetze gliichzitig usglöst. Wemesech di Naturgebilde, wo über tuusigi vo Jahr entstange si, 20 Jahr u Millione Touriste speter vorsteut, wird eim bau Angscht u Bang.

E mongolischi Metzgete 21.10.2017 - Irgendwo bire Nomadefamilie ir Wüeschti

Di erschti Nacht heimer im Gascht-Ger vore Nomadefamilie übernachtet - irgendwo wos süsch nüt ussert Wüeschti het. Womer gmüetlech bi ihne im Ger (wo näbst Telefon u Fernseh o e Wöschmaschine het gha) si bime Glas Arak binang ghocket, seit d’Zelmong uf zmau ganz fröidig, si heig iz grad e ganzi Geiss für üs kouft. Si wärd när grad gschlachet u mir chönni zueluege. Mir hei z’Entsetze wonis isch i d’Gsichter gschribe gsi versuecht miteme Lächle z’überdecke. Sischnis du no e Spur mulmiger zmuet worde, womer das dicke Geissli verusse ame Pfoschte aabunge gseh hei. U gliich hetme sone Glägeheit nid chönne verpasse - irgendwie.

Dr Fridolin

Vo denn a isch aues ganz schnäu u völlig unerwartet vostatte gange: Maa u Frou hei di Geiss gmeinsam ufe Rügge kehrt, dr Maa ischere ufe Haus knöilet, het miteme Messer e churze Schnitt i Buuch gmacht, iche grekt u mitere schnäue Bewegig wider usegschneut. När heter d’Pupille vor Geiss geng wider überprüeft - di het vo denn aa wosi ufem Rügge gläge isch ke Ton me vosech gä - d’Bei heisech aafa entspanne, d’Luft isch zur Nase use cho, z’Läbe hetse verla. Aues isch wahnsinnig ruehig und unbluetig abglüffe. So gar nid wasmer erwartet hei u grad drum umso besser. Mitem Griff i Buuch heter schiins d’Houptschlagadere dürtrennt. Z’einzige Wärchzüg füre ganz Prozess: es gwöhnlechs Chuchimesser. Mir si beiidruckt gsi, wi ruehig u routniert di Metzgete isch abgloffe. D’Sunneungergangsstimmig het dem Ganze e spezielli Atmosphäre verleiht. Wo dr Körper bis ufe Chopf isch vom Fäli glöst gsi, isch di Sach i z’Ger verlageret worde. Da ersparemer öich itze d’Details u lö d’Biuder la rede.

Wär sich getrout, cha ufnes Biud klicke zums aaluege

Z’gseh, wime uf engschtem Ruum cha e Geiss usnang näh, Innereie wäsche u grad drnäbe no Znacht choche, het di hochhygienische Massnahme vom Schwizerland bau chli i z’Lächerleche zoge.

U hie no z’grüsigschte vo aune

Einisch isch du aber gliich o gnue gsi und mir heinis i üses Ger verzoge u dert di Pasta mit Tomatefleischsosse abegwürgt (es sigi Beef hetmenis versicheret). Geiss hets du zum Dessert gä - es Täuer vou kocheti Innereie wonis dr Van säubstverständlech zu jedem Stück genau het chönne säge wases isch und weles iz z’aueribeschte isch. Dr Phippu hetsech no chli Niere gönnt, d’Steffi het allei bim Aablick gnue drmit z’tüe gha z’luege, dass dr Houptgang blibt woner isch.

Bemerkig: Er metzget o säuber Kameu. Dene schlater es Bieli i Schädu u dürtrennt so d’Houptadere.

Über aui Bärge 23.10.2017 - On the road

O faunamässig het d’Gobi einiges z’biete. Dr säutnig Gobibär u d’Wiudform vom baktrische Kameu heimer leider nid gseh, drfür het dr Dampa es paar Gazelle ufgschüücht (gar nid zur Frödi vor Steffi), im Geier-Tau isch e Bartgeier übernis kreist u ufem Weg zu de Sanddüne hetsech ufeme Hügu e Argali-Schafsbock la blicke. Aber no bevormer aui üsi Kameras hei chönne zücke, isch de Cheib über aui Bärge drvo. Mir hei gfunge so nid Bürschtu, si usem Charre gumpet u hei sofort d’Verfougig ufgno. Geng weme wider e Hügu het erklomme gha, hetme de Bock drei Hügle witer vore o wider z’oberscht druff erblickt. Dr stuur Chopf vor Steffi, z’unschlagbare Zoom vo üsere Kamera u z’gnue lange Innehaute vo dem imposante Tier, hei du doch no zume veiechli guete Foto gfüehrt.

Haloxylon ammo­dendron oder o Gobi Tree Ime chliine Teu vor Wüeschti

Me seit es isch hüüfig dr einzig Boum wome fingt ir Gobi, das chöi mir so bestätige. Obwouhmer nid schlüssig si öb das chliine Gwächs tatsächlech dr Name “Boum” verdient het. Aber er wachst ja schliesslech ire Wüeschti. Bau meh Fragezeiche het d’Tatsach hingerla, dasses grossi iizuuneti Wiederufforstigs-Flächine het gha u kener zwe Kilometer drvo entfernt heimer am Aabe dr Ofe i üsem Ger mit Gobi Trees iigfüüret.

Sanddüne erklimme 23.10.2017 - Khongoryn Els

D’Khongor Sanddüne hei dr südlechscht Punkt vo üsem Trip markiert u ghöre definitiv zu de Highlights. Ds Düneband wo um di 100km läng u öppe 15km breit isch, gseht us aus hättmes dert häre ta, damit di Wüeschti doch ono chli z’klassische Wüeschtiussehe überchunnt.

Womer unger ar Düne si los glüffe isch die wine grosse Berg vornis ufgragt, um di 400 Meter höch. Di Koreaner wo scho denn zwe Drittu obe erschöpft si ume gläge, si ono dert gsi wos mir bis dert hei gschafft gha. Es isch e physischi und psycheschi Useforderig gsi! Ei Schritt obsi, zwe Schritte wider nidis, ei Schritt obsi, zwe Schritte wider nidsi. Was eim aber dobe erwartet het, het aui Aasträngige wider guet gmacht. Vom Grat us hetme uf di angeri Site gseh wosech witeri chliineri Düne bis hingere zu de verschneite Bärge erstreckt hei. Dr Sunneungergang isch scho bau chli z’viu Kitsch gsi. D’Frou Van het gar nid ersch probiert u dr Van hets mit Ungerstützig uf de letschte Meter zwar nüm ufe Sunneungergang, aber gliich no bis z’oberscht ueche gschafft. Z’Beschte chunnt zum Schluss - i dem Fau Düne abe gumpe, sekle u trööle.

Fossil Vallhalla Nenntme d’Gobi o

Wome 1920 ir Gobi nach Spure vo Mönsche gsuecht het, wüume überzügt isch gsi, dass d’Wiege vor Mönschheit da ligt, hetme stattdessi unzählegi Dinosaurier Fossilie gfunge. Unger angerem vieli Näschter mit Eier drinne aus erschti Evidenz für Bruetverhaute bi Dinosaurier u d’Verwandschaft mit de Vögu. No so beiidruckend. Nid minger beiidruckt simer du gsi, womer bim Bsuech vore Chloschterruine ime Ger, zwüsche aute Schrifte u Tassli gmacht us Mönchsschädle, hei e versteinerete Dinosaurierschädu entdeckt. Eifach so dert ischer gläge u me hetne chönne i d’Häng näh u drmit Föteli mache. E echte, komplett erhautene Dinosaurierschädu wo a angerne Orte d’Houptattraktion wär - hinger 10cm dickem Panzerglas u vo mindeschtens 15 Sicherheitskameras überwacht. “Wieso o sones Gschrei abeme versteinerete Schädu abla?”, wirdsech dr Mongol gseit ha wone gfunge het - ufem Weg zum Schisshüsli, ame hundsgwöhnleche Mittwuchnamittag.

Jubiliere 23.10.2017 - Im Ger bi de Sanddüne

Vans hei uf dere Tuur 13 Jahr verhüratet si gfiiret. Da heimer üs natürlech nid la lumpe und entsprechendi Vorbereitige troffe. Het gheisse, mir hei ime chliine Copyshop es Gruppefoto mit üs aune la drucke u iirahme. När hei mir Schwizer zäme mitem Dragan 5 Fläsche Bier kouft, dr Nico no 2 u womernis im Outo wider troffe hei, hei Vans ono 2 Fläsche kouft gha. 9 Fläsche Bier à je 2.5l - sött knapp länge. När heimer dänkt, mir choufene no e grossi Wurscht (d’Vietnamese hei aagfange immer e Wurtsch uf Reserve zha, damit sicher geng gnue Fleisch ume isch) und e Nagukluppe (si heinis bau au Aabe gfragt öbsi üsi dörfe bruuche - ke Ahnig was die mit ihren Negu gmacht hei). Z’Feschtmauh hei dr Dampa u d’Zelmong präpariert, es Mongolian Barbecue. Wüumer ja schliesslech si ir Mongolei gsi, het das bedütet, e u huere Pfanne vou ghacketi Geiss (ja genau die) u drnäbe 2 chliini Täuerli mit öppis Gmüesigem. Vans hei nume gmeint: “Special day with special people in a special place - very special for us”.

Nume z’Beste vor Geiss

Me cha nid nume Chüeh mäuche Nomadetum im Augemeine

Ir Mongolei heimer ja so einiges gseh u glehrt. Unger angerem, dassme nid nume Chüeh u Geisse u Schaf cha mäuche, sondern o Kameu u Ross. Derbi isch d’Usgangslag geng meh oder weniger di glichi gsi. D’Jungtier si entweder ame Ort aabunge oder iizuunet gsi u d’Müettere freiwiuig dernäbe. U weme het wöue mäuche, hetme eifach z’Jungtier näbe z’jewilige Muettertier bracht, das uf dr einte Site la mampfe und uf dr angere Site dr Teu abzwackt wome när het zu Miuchtee oder Chäs verarbeitet. Di Tier si ja aui haubwiud, de muessme chli mit angerne Technike uffahre.

Gorkhi Terelj Nationalpark 27.10.2017 - 28.10.2017 - Nordöstlech vo Ulan Bator

Ufem Rückweg nach UB heimer no e Abstächer i Nationalpark gmacht, wo vorauem (wes wermer u summerlecher isch) die Lüt bsueche, wo nid so viu Zit hei ir Mongolei. Wi touristisch dasses normalerwiis isch, gsehtme a de viele Ger-Camps und Hotel wo no im Bou si - u das ime Nationalpark. Ufem Weg gsehmer dr erscht und einzig Bewiis, dasses Wöuf git ir Mongolei, er schiint aber verletzt z’si u humplet i z’Gebüsch. Es isch de o z’erschte Mau gsi uf dere Tour, womer direkt vom Ger us si los gwanderet. Top. Nach der Besichtigung vom buddhistische Chloschter heimer gseit mir wöue zrügg loufe und di Glägeheit grad usgnützt no chli i dere schöne Natur ume z’wandere u z’chlättere. Bim düre Zündhöuzlilärchewaud loufe sinis d’Wöuf wider z’Sinn cho u womer grossi Spure hei gseh im Schnee, o Bäre. Mir hei nüt gseh, wär üs aus gseh het wüssemer nid.

250 tons of stainless steel Vou krass

Di ober­superlativi­megakrass­guiness­worldrecords­Dschingis­Khan­stainless­steel­statue usserhaub vo Ulan Bator heimernis ja nid chönne la entga. Si isch 30 Meter höch, me cha überne Stäge ufe Chopf vom Ross stige und am Dschingis i d’Ouge luege. U d’Ussicht isch o nid z’verachte.

E tolli Zit geit z’Änd

Mir si z’zwöitehöch usem Guesthouse in Ulan Bator use u 16 Täg speter, stinkig (acht Täg ohni Duschi) u mit vier witere Lüt im Schlepptou wider iche cho. D’Fröid isch gwautig gsi.