Pirate­stadt mit UNESCO Wäut­kultur­erbe Status

D’Autstadt vo Fenghuang (凤凰古城) isch nume e munzig chliine Teil vor eigentleche Stadt, aber dr einzig Grund wieso dassme di Stadt, wosech i aui Richtige im Smog verliert, bsuecht. 1704 erbout - e wahri Autstadt. Und obwouh dassi früecher het d’Gränze zwüsche dr Han Bevöukerig in Zentrau-China und de Tujia und Miao Minderheite vo de Südweschtbärge markiert, het Fenghuang aus Zentrum für Handu und Kultur floriert. Es hetsech e viufäutegi Bevölkerig biudet und no hüt ghört meh aus d’Heufti vo de Iiwohner zu de Tujia oder Miao Minderheite - vo keire stamme aber namhafti Pirate ab.

Wesech angerne Orte aus um Karschtsüüle dräiht, isch hie dr Fluss z’dominierende Element. Nid nume Froue wo ihri Wösch am Flussufer wäsche sinis grad sofort ufgfaue, sondern o di läbige Tier i Chäfige wo jedes Restaurant verusse het usgsteut gha. Unger angerem Stockente u Bisamratte. Angesichts dr miserable Hautig, hetmene bau gwünscht, dass glii e gfräsige Tourischt verbi chunnt u Luscht uf Stockentehirni u Bisamratteschwanz het :-( Wie dassi d’Shrimptätschli, wome bi jedem Snackstand het chönne choufe, hei zuebereitet, tüemernech bewusst vorenthaute.

Aber das si aus nid d’Gründ gsi, wieso dassmer unbedingt uf Fenghuang hei wöue. Di Austadt gseht us wi dr Dräihort vo Fluch der Karibik. Mit de höuzerne Stäuzehüsli mit gschwungene Decher u uförmige Baukön wosech am Flussverlouf na schmiege, de steinige Bogebrügge u de enge verwinklete Gasse, isches di perfekti Piratestadt. Dassi nid am Meer ligt und dr Tuo Jiang Fluss zersch no i Yangtze Fluss fliesst (dr längscht Fluss vo Asie u dr drittlängscht vor Wäut) unds somit e gfüuhti Ewigkeit gieng bisme de irgendeis sauzigs Wasser würde erreiche, tüemer iz hie eifach mau aus unwichtigs Detail überseh. Überzügetnech säuber:

Me chasech di rumtrinkende Pirate wo uf höuzige Fässer am Flussufer hocke u lut umegrööle richtig vorsteue, stimmts? U süsch hie no mit sehr überzügender Nachtbelüchtig:

Z’Märit

Womer ir Muslim Street in Xi’an di ufghäichte Schafliiber u marinierte -füess gseh hei, hetnis düecht, das sig iz scho veiechli wiud - bismer uf Fenghuang si cho, wosi vor üsem Zimmerfäischter usse jede Morge Einzuteili vore Sou hei feilbotte. So schnäu wi das aube a Maa u Frou bracht isch gsi, hättme chönne meine es sige warmi Weggli.

Wemer aube nachem Nudusuppezmorge wider si i z’Zimmer cho, isch dr Gring scho verchouft gsi - de muess eifach guet si (versuechemernis hüt no iizrede, wemer dra zrügg dänke).

U wüuder bestimmt no nid gnue heit gseh, weimernech o di tröchnete Variante drvo nid vorenthaute.

Chouf e tröchnete Söigring und du überchunnsch e Zigi gratis (heissts gloub)

U no öppis Schöns u Feins u Süesses für d’Söi z’vergässe: