Üsi Reis

Am 31. Ougschte geits los. Z’Bärn am Bahnhof stigemer i Zug ii u reise ab Richtig Wien. Für witer uf Moskau geits dür d’Tschechei, Pole und Belarus. Wemer de die erschte ca. 2’000 km abgratteret hei, simer zersch mau chli in Moskau, bevors de mit dr Transibirische Isebahn witer richtig Oste, quer dür Sibirie geit. Teu Lüt säge, im Winter uf Russland sig e schlächti Idee, mir nä aber öppe de e Huet u e Mantu mit, de chame d’Häng i d Mantutäsche tue.

git schön warmi häng

I hoffe mir schaffes chli witer i Oste und chöme de irgendeinisch a Baikalsee, chli bädele und hopplahü witer id Mongolei. Dert simer de afe einisch e chli u luege wies Wätter wott. Vo dert a isch eigetlech nüt me planet, aber dr nächscht Haut isch de öppe Peking.

U was chunnt när?

Kei Ahnig, aber mir gö öppe Richtig Süde, gniesse d’Sunne, ds guete Ässe, d’Müggeli und die bestimmt fantastischi Natur. Mir si sicher, dir läset regumässig dä Blog, mir si o sicher dasmer regumässig es paar Zile schribe und vorauem o Föteli mache.

bis när — steffi & phippu