— 27.01.2018 —

Uf Peking

Üsi erschti stehendi Zugfahrt in China isch eher unglücklech verloffe, drum hei mir üs für d’Witerreis nach Peking nach angerne Reisemethode umegluegt. D’Larissa und dr Ole, im letschte Post churz aagsproche, hei da e tolli Idee gha und üs o grad vorgmacht wie das geit. Si hei nämlech e Tag vor üs ihrer Ruckseck packt, si mitem Bus us dr Stadt use gfahre und heisech bir Outobahnuffahrt, diräkt hinger dr Mautsteu, miteme Kartonschild ufgsteut. Ufem Schiud isch uf chinesisch gstange: “Per Outostopp uf Peking”.

Was die chöi, chöi mir scho lang

heimernis gseit und heinis ar Rezeption es glichigs Schiud la fertige. Mir hei o e Bus us dr Stadt gno und üs hinger dr Mautsteu platziert, fründlech glächlet und üses Schiud jedem Outo hoffnigsvou entgägegstreckt. Me het üs gseit es Schiud sigi sicherer, wiu wemes uf Chinesisch usspricht und d’Betonig nid trifft, chönntme äbe o säge: “Ig wot Scheisse ässe”. Das heimer nid wöue riskiere.

Bildbeschrieb
Bildbeschrieb
“Outostopp Rad Norde Houtpstadt”

Fasch zwo Stung simer dert gstange u hei viune Fahrer üses Schiud häregha, aber kene hetsech wöue erbarme. Bi viune heimer z’Gfüeu gha, si verstö gar nid was druff steit. Mir hei du usegfunge, dasses churz nach dr Mautsteu ono e Abzweiger ine angeri Richtig het gha. E chli frustriert heimernis derzue entschide, dr Standort z’wächsle und zure angere Mautsteu z’louffe, vo wo us vilech meh Lüt uf Peking fahre.

A Chopf länge

Dä Plan het zersch überhoupt nid funktioniert und mir si nach 3 Stung am Strasserand stah sehr churz dervor gsi, ufzgä. I dem Moment het e wiisse SUV stiu gha u zwe Giele hei dr Chopf zum Fäischter us gstreckt und üs gfragt, womer häre wöuge. E chli stutzig, wiu das eich gross ufem Schiud steit, heimer gseit “Beijing”. Si o, heimer mit Hiuf vom Google-Übersetzer use gfunge. Di zwöiti Frag isch gsi, wieso dassmer de nid dr Zug nämi. Da ischnis bewusst worde, dass ds Konzept Outostopp in China völlig unbekannt isch… Natürlech simer o da druf es gwüsses vorbereitet gsi und heine sofort es Blatt Papier unger d’Nase gha wo druffe uf Änglisch und Chinesisch isch gschribe gsi, wärmer si und wasmer mache. Das hetse du überzügt u mir hei üser Ruckseck chönne iilade u iistige (Yeah!).

Uf dr viertstündige Fahrt heimer üsi Konversation mit Übersetzigsapps fortgfüehrt. Si si us Datong und wei es Wuchenend uf Peking ga fiire. Üser Reiseplän heisi rächt benide, si wetti ou gärn ga, aber es sig so kompliziert mit de Visas. Wos scho isch fiischter gsi, heisi üs dörfe säge dassme hie, womer grad düre fahre, di grossi Muur vo China würdi gseh - danke schön.

35km bis Peking
Es nachetim (35km bis 北京 oder Beijing)

Womer so langsam vo de Liechter vo Peking si umgä gsi, fragesi üs, wo mir gnau häre wei. Mir hei i d’Hutongs wöue, wiu mir dert bim Peter ufem Sofa hei dörfe übernachte.

D’Hutongs, ängi verwinkleti Gasse und verschachtleti Gebäude ir Mitti vo Peking, wo no keiner Wulchechratzer oder Outobahne stöh - si schrumpfe aber, dert wosi nid aus schützenswert deklariert si.

Auerdings hei mir mitem Peter no müesse abmache wo mir üs träffe u hei kei gnaui Adrässe gha. Mir hei du üsne Fahrer gseit, si söue üs eifach bire U-Bahn Station uselah u mir luegi de scho. Mitts uf der Strass voreme Restaurant heisi aaghaute und üs useglah. D’Lüt hei scho schreg gluegt u wo mir die grosse Ruckseck usem Kofferrum hei gno, het dr eint oder anger z’Muu offe vergässe.

Üser Fahrer
Es het natürlech no es Föteli bruucht

Mir si chli überwäutiget gsi vo dere riise Stadt (18.5 Mio Iiwohner), heinis aber schnäu z’rächt gfunge wiu die wichtige Sache ou uf Änglisch si aagschribe gsi. Üses nächschte Zieu isch gsi e Ort mit Internet z’finge und am Peter z’schribe mir sige aacho. Mir hei usserdäm e Toilette brucht und wius bim Usgang vor U-Bahn Station grad e Mäc het gha heimer dänkt, zwe Flöige uf ei Tätsch. Luschtigerwiis heimer dr wahrschiinlech einzig Mäc uf dr Wäut gfunge wo weder es WC no WiFi het. Dr Burger het gliich abe müesse und mir hei imne hippe Stübli es tüürs Tee drufglärt. Die hei derfür WiFi gha u so het du doch no aues klappet.