Chengdu Superlative

In Chengdu gits mindistens drü Superlative - und mir si aui go luege. Derbii heimer festgsteut: China het e bemerkenswärte Gäutigsdrang.

Ds grösste Gebäude vor Wäut

Bildbeschrieb — Es het nid mau uf eis Föteli möge

… wes um Bodeflächi geit. Ds New Century Global Center (新世纪环球中心, xīnshìjì huánqiú zhōngxīn) het e eigeti U-Bahn Station, goldegi Routräppe, e Strand mit Wäuebad und Ligistüeu, isch 500 läng u 400 Meter breit u bietet 1’700’000 Quadratmeter Flächi (uf mehrerne Stöck, für d’Mathematiker). Das isch meh aus zwöi Fuessbaufäuder. Das Gebäude isch so gross, es bietet Platz für au öii Müetere (schwöre (mann(!))).

Dr grösst Buddha vor Wäut

Z’dänke, dass dr Buddha ganz viu chliini Schisse ufem Chopf het, isch Gotteslästerig, pfui!

… wo us Stei gmeisslet isch (dr würklech grösst Buddha steit in Japan, aber China isch zwe nöii grössti Buddhas am boue). Usere 70 Meter höche Klippe hei Arbeiter um ds Jahr 700 in 90 Jahr Büez e sitzendi Buddhastatue usegmeisslet. Elei d’Ohre si sibe Meter läng. Die Statue wacht in Le Shan (乐山) über drü Flüss, wo a dere Steu zämefliesse. D’Idee für die Statue isch amne Mönch cho, wüus uf dere Flusschrüzig so viu Bootsunfäu het gä. Obs sider besser isch, wüssemer leider nid.

Die besti Opere vor Wäut

D’Sichuan Provinz isch berüehmt für ihri Opere. Oder eher berüchtigt. Wüu wenns nid die besti Opere vor Wäut isch, ischs doch ganz bestimmt die schrillschti. Gloubetnis nüt, lueget säuber:

Aus nächsts simer no einisch i d’Bärge. Nöie Versuech, nöis Glück, bis gli.