Die grossi Muur vo China

Die Gschicht faht nachere länge Diskussion, ob si überhoupt söu stattfinge, aa. Dassi aafat isch grössteteils üsem jugendleche Übermuet z’verdanke, wo mit knapp 30i offebar no vorhande isch. Mir hei üs nämlech mit Zäut, Sack u Pack richtig grossi Muur vo China ufgmacht — zmitts im November. Ei Faktor wo derfür het gsproche, isch ds nöie Zäut gsi, wo mir ir Mongolei, ar Steu vom viu z’chline us Russland, erstange hei.

D’Muur isch vo Peking us a diversne Steue erreichbar, dä Teil wo mir üs hei vorgno startet in Gubeikou (古北口) und isch eine vo de wenige nid restaurierte Teile. Mit U-Bahn und zwene Busse isch dä Ort i ungfähr 4 Stung erreichbar, mir hei d’Zit aber chli fautsch kalkuliert und si in Gubeikou aacho wos scho isch fiischter gsi. Das het gwüssi Problem mitsech bracht, unger angerem heimer kei blasse Schimmer gha wo d’Muur isch oder wieme dert häre chunnt. Maps.me het üs aber us dr Schiissi grettet wiu dert mängisch ou dr auerichlinscht Wanderwäg iizeichnet isch. Bim Tickethüsli hei mir üs ir Dunkuheit am Wächter, wo het Fernseh gluegt, verbigschliche und hei ungloublecherwiis e Trampupfad dr Hoger uf und obe druffe di Muur gfunge.

Mit üser einzige Stirnlampe (dr Phippu het sini ds Wien la lige) simer no e Stung lang ir Dunkuheit uf dr Muur glüffe bis mir zu dem Wachturm si cho, wos im Reisefüehrer derzue heisst, är eignisech zum Übernachte. Mit toube Finger aber ganz euphorisch heimer üses Zäut zum erste Mau ufgsteut und si handtli ga lige — es isch doch e rächt chüehle Wind gange. Ir Nacht druf ischs so richtig cho Lufte und nid nume mir, sondern ou üser gfüute Omelette, d’Öpfle und sämtlechs Wasser si am Morge gfrore gsi.

D’Sunne het itze dä Teil vor Muur beschune, womer gester ir Nacht gloffe si, im Oste si die unendlich schiinende Hügle gäge Horizont im Näbu versunke. D’Zinne vor Muur heisech wie Zagge ufeme Rügge vomne Drache ir Ferni verlore, hie und da gspickt miteme Wachturm. Bevor mir ds Zäut ganz hei chönne zämebräche, isch tatsächlech e Ticketverchöiffer uftoucht und mir hei am sibni am Morge müesse das Ticket chouffe, womer gester prellt hei. Womer ds Zäut hei zämepackt gha und wider legau ungerwägs si gsi, het die Wanderig so richtig chönne losga.

Es Zitli ischs no am aute Teil vor Muur (Ming Dynastie, 1368–1644) na, bevor es militärischs Sperrgebiet d’Muur chrützt und me e Umwäg het müesse mache. Churz nacheme verlassnige Farmerhüttli mit zerfauende Kang Bett (Ofebett) heimer Rast gmacht - d’Omelette si zum Glück wider uftouet gsi, ds Wasser no nid ganz.

Am Namitag ischs uf Jinshanling (金山岭) zue u dä Teil vor Muur isch ersch chürzlech restauriert worde. Usserdäm hets es Seilbähnli wo ueche fahrt und dr Iitritspriis, womer dasmau nid si drumum cho, isch dopplet so höch gsi. Dä Teil isch chli touristischer, aber hie hets eigetlech meh Putzpersonal gha aus Touriste.

Ir erschte Nacht heimer festgsteut, dass e Wachturm so ziemli dr blödscht Ort isch, für nes Zäut ds steue. Wachtürm si vo jeder Site komplett dürlöcheret und stö z’oberscht uf de Höger. Drum heimer üs ir zwöite Nacht chli absits vor Muur i de Büsch verchroche. Dert ischs einigermasse windstiu gsi und me isch chli weicher gläge.

Am nächschte Morge heimer scho wider wäg däm Ticket g’angschtet — dasmau heimer nid es zwöits mau füre glich Abschnitt wöue zahle. Drum simer nam zämebräche ganz süüferli der Muur zue tüüselet u hei schüüch ume Egge glüüslet ob d’Luft rein sig. Mit schauendem Glächter heinis hinger de Zinne füf Putzfroue und e Verchöifere begrüesst. A üser Schliichtechnik müessemer no chli fiele.

Uf dr restaurierte Muur ischs du witer gäge Simatai (司马台) zue. Churz nachem Mittag wärdemer vomne Typ hingeremne Wachturm ufghaute. Mit wiude Geste und emne knappe “No Tickets” heter üs dr Wäg versperrt. Unglöibig heimer nacheghaket u hei mit Übersetzigsapps sis chinesische Gschwafu probiert z’rekonstruiere. Offebar bruchtme füre Simatai-Teil vor Muur es Ticket, wome aber nur im Ort unge cha chouffe. Für i Ort abe heimer aber natürlech dr Simatai-Teil vor Muur müesse nä.

Uf dr Suechi nach Auternative simer ufne Pfad gstosse, wo absits vor Muur unger am Hügu na uf Simatai füehrt. Bingo - heimer dänkt - u si am nächschtbeste Trampupfad dür d’Dornebüsch ache is Tau gfougt. Churz bevor me im Tau aber zu dere Strass uf Simatai chunnt, het üs e Zuun dr Wäg versperrt. Trotz de Sicherheitskameras simer drumum gchlätteret und dürne Art Müll-Grabe dere Strass zue gstapft.

Wit simer aber nid grad cho. Nach öppe 5 Meter hets vo hinge gheepet und e Büebu i Trainerhose und Simatai-Gilet isch drhär cho u hetnis gfragt öbmer es Ticket heige? Mir hei gmeint mir ghöre nid recht. Er hetnis churzerhand sis Smartphone unger d’Nase gha wo druff isch gstange, mir müessi es Ticket chouffe für hie düre z’louffe. Mir sigi ir “Scenic Area of Simatai”. Es isch mittlerwile drü am Nami gsi und mir hätte rächt gärn in Simatai e Bus zrugg uf Beijing gno, drum heimer veiechli aus a Usrede probiert wonis isch i Sinn cho, aber er het nume gmeint: “Entweder chouffeter itz es Ticket oder dir chöit chere”. Nachdäm mir e Haubstung im Ghüder vor “Scenic Area of Simatai” mit däm Typ gliiret hei, simer zu sire Beluschtigung zwüsche Zuun u Feus zrugg gchlätteret u si dürs Tau zrugg ar Muur zue gschuenet.

Im Tau unge isch sit langem kei Mönsch me gsi, es paar auti Relikt hei aber überläbt, unger angerem es verlassnigs Dörfli und das riesige Schiud, wo Bsuecher druf ufmerksam macht, dassme itze ir “Scenic Area of Simatai” sig und doch bitte es Ticket söu erstah. Ja schiins.

So heimer no einisch im Waud gschlafe und ou dasmau isches eher früsch gsi. Am Morge isch ömu d’Chappe, womer im Schlafsack inne hei annegha, gfrore gsi. Womer wider gäg d’Muur si ufe gloffe heimer festgsteut, dassmer fasch am gliche Ort wie letscht Nacht gschlafe hei und hei dr glich Iigang uf d’Muur no es zwöits mau gno. D’Putzfroue hei nomau ds Füdle vou glachet und mir hei dr restauriert Teil vor Muur no bi strahlendem Sunneschiin dörfe ufekraxle — mitem gliche Ticket!

Mir hei du nid nomau probiert uf Simatai z’cho, sondern si in Jinshanling uf dr Nordsite dr offiziell Wäg ache u hei bir Outobahnraststette e Bus uf Beijing zrugg gno. Mir hei d’Schnure vou vo “Scenic Areas”.