Fanpu Farm

Eis chame vorusschicke: dr Phippu läbt o hüt (19. Dezember 2018) no. Zum Glück!

Wi gseit, heimer du schlussendlich de Plan, vo Shangri-La dür d’Bärge über Litang uf Chengdu z’fahre, müesse uf die nächschti China-Reis verschiebe. U de simer haut wider zrugg i Süde uf Kunming gange, hei ds Gebirge imne grosse Boge ostwärts umfahre und si schliesslech dürs Flachland uf Chengdu cho.

Wasmer verpasst hei (Photo: Michael Yamashita @supchina)

Wasmer derfür gseh hei

Mir heinis dasmau vorsorglicherwiis es gschlossnigs Schlafabteil gönnt, ir Hoffnig, nid di ganz Nacht müesse passiv z’rouche, u de Plan isch veiechli guet ufgange. Wo di chinesischi Familie mitem grännende Bebe isch iche cho, heimernis drbi ertappt, e churze Moment drüber z’siniere, was ech schlimmer isch…

Farmläbe

Dr Grund, wieso dassmer eigentlech so unsverrode uf Chengdu hei wöue, isch unger angerem d’Fanpu Farm gsi. Das isch e biologischi Farm wosech vorauem uf Umwäutbiudig für Ching und Jugendlechi spezialisiert het und zahlriichi Projekt und Aaläss organisiert — aus mit dr Hiuf vo Freiwillige us dr ganze Wäut.

Über Workaway heimer üs bi ihne gmäudet und si hei no Hiuf bruucht. Mir sinis auerdings nid ganz sicher gsi, wasmer vo dere Freiwilligearbeit wei haute. Einersits geitme gäg Kost u Logie ga schaffe (ines Land wo nid aui Büez hei), angerersits bringtme Ideene und Know-How ines Projekt, wo ohni usländischi Inputs so nid würd existiere und hiuft so de Ching, d’Natur besser z’verstah. Uf jede Fau ir Theorie, drum heimer üs derzue entschide, Praxiserfahrige z’Sammle. Am Sunnti Aabe, 14. Januar (2018) simer uf dr Farm aacho.

Mänti: Cutting Grass

Am sibni isch Tagwach gsi, es het es fantasieloses Zmorge mit Riis und irgend ere Art Rüebe gä. Ds Gmües chunnt vor Farm und im Winter wachst haut itz mau nüt angers. Direkt im Aaschluss heimer vom Dayan (大雁 = freii, höch flügendi Wiudgans; si Name uf dr Farm) Arbeitsmateriau und -uftrag gfasset: Cutting grass - mit verrostete, stumpfe Handsichle. Dr erst Enthusiasmus het sich blitzschnäu gleit. Wenigschtens hets warm gä; d’Daune- u Rägejagge u z’Mikrofaserjäggli heimer glii eis chönne abzieh.

Zischti: Cutting Grass — again!

Mit gwüsser Vorfröid uf die zahlriiche angere Arbeite, wo ufere Gmüesfarm so aafaue, simer mitem genau gliiche Zmorge wie gester i zwöit Tag gstartet u grad schnuerstracks ufe Bode vo de Tatsache zrüggcho wos het gheisse: Today we’re cutting grass… again! Wüu das nid wahnsinnig spannend isch, gits a dere Steu e chliini Anekdote vom Aabeprogramm.

Mir si mit de Iiheimische, notabene us dr Sichuan-Provinz, ga Hotpot ässe. Wosi üs erklärt hei, wasme da gnau isst, heimer e unerwartete Aha-Moment gha: Es isch wie Fondue, aber mit Fleisch und Gmües. Wie Fondue-Chinoise, heimernis so gseit. Chinoise… tagets?

Einewäg, wos um ds Bsteue isch gange simer froh gsi um d’Hiuf vor Fiona (die Zueständigi für die freiwillige Häufer), wo ds kryptische Bsteuformular für die unzählige Zuetate u Biilage usgfüut het. Mir heinis für ne Moitié-Moitié Variante vor Suppe entschiede, da mir vor dr Sichuan Spicy Soup rächt Bammu hei gha.

Während mir üs am Buffet d’Dip-Sösseli zämegmixt hei, si d’Zuetate uf einzelne Täuerli serviert worde. Womer zrugg a Tisch hocke fingemer zu üsem grosse Schrecke es Täuerli miteme rohe, rosarote Hirni ufeme Salatblatt.

D’Fiona het gschwore dass si das nid bsteut heig, gloubt hetere das niemmer. Wos gäg ds Ändi zue isch gange, isch das Hirni immer no unberüehrt dert gläge. Uf z’Mau het dr Anti-Foodwaste-Safe-The-Earth Impuls im innere Konflikt, wosech scho lang zämebraut het, d’Überhang gwunne und hetnis is Ohr gflüsteret: “Wär ja schad das itze nid z’probiere”. D’Chinese heis ir scharfe Suppe wöue choche, i üsem Wahnsinn heimer aber gfunge so schmöckme dr Gschmack ja gar nid use. Ds Fazit: Söili-Hirni het nid e wahnsinnig guete Gschmack, ganz z’schwige vor matschige Konsistenz. De scho bau lieber Äntemage.

Mittwuch: No Cutting Grass

Mir hei scho fasch nümm dra gloubt, aber mir si, wenn ou nume temporär, däm Unchrut Meister worde. Bir nöie Ufgab heimer au üsi Schrebergarte-Erfahrig chönne iibringe; es isch nämlech drum gange e Wärchzügschuppe z’boue. D’Boustandarts in China wiiche e chli vo dene ir Schwiz ab. Er het zum Bispiu nid müesse Ärdbebesicher sii, kener 20 Kilotonne TNT ushaute und me het ou keis Bougsuech mit Bouplan müesse iireiche. Aber es Betongfundament hets, zur grosse Fröid vom Phippu, gliich eis gä.

Das Hüsli isch natürlech nid i eim Tag gstange, d’Föteli si meh e Collage vom Fortschritt bis Ändi Wuche. Mir hei sehr Fröid gha, uf der Fanpu Farm doch no chli öppis Blibends chönne z’erschaffe. Übere Chrampf im Wassergrabe unger isch mittlerwile bestimmt scho wider Gras gwachse u d’Steine si lengstens wider dri trolet.

Donnschti: D’Prinzässin und ihri Spiili

So schreg wie dä Titu, isch ou dr Donnschti gsi. Spieutag isch aagseit gsi, u üser chinesische Kollege u Kolleginne si aui scho ganz usem Hüsli gsi drwäge.

Am Morge hei mir üs ufem Appellplatz versammlet und dr Vorarbeiter i de Militärhose het mit ere Trillerpfiffe für Rueh gsorgt. Mit ärnstem Tonfau het är drufabe Spiili erklärt, wo bi üs im Chindergarte oder bi Teambildigsevents vor SVP gspiut wärde:

• Im Kreis loufe bis zum Signau u när i Vierergruppe zämestah, die wo übrig blibe wärde bestraft.
• Im Kreis stah und enang d’Häng gä und dür ne Hula-Hoop Ring schlüüfe biser einisch ume isch, weme z’langsam isch wird d’Gruppe bestraft.
• Staffette, dr Verlierer wird bestraft.
• E Parole ufsäge (“Mir [China] si die Beste”) u derzue im Takt ufe Tisch chlopfe, wär drusgheit wird bestraft.

Mir tüenis gärn zu öier Ungerhautig blamiere

Das ganze Gscheh isch vore uffauend unpassend aagleite Chinesin, im Gitzerröckli mit Rüüscheli und Haarschmuck, gfiumet worde.

Öppe so, nume mit viu meh Glitzer

Wieso genau dassmer da mitgmacht hei, obwou mir üs huere blöd si vorcho derbii, wüssemer hüt no nid. Irgend so es psychologisches Phänomen, äuä. Dr Spiumodus isch aber rächt uffauend uf Bestrafige usgleit gsi. Die si zwar so chindlech gsi wie d’Spiili säuber: es Tier nachemache, de Gwinner e Massage gä, Chnöiböigine etc. Trotzdem hei üser chinesische Spiukamerade richtig Angst dervor gha z’verliere. Die Spiili si ihne aui scho us der Schueu bekannt gsi - das het dere Parole über China so chli dr bitter Biigschmack vo Ghirnwösch gä.

Aaschliessend heimer zäme Dumplings gmacht (uf die heimernis richtig gfröit, e Abwächslig vom Riis mit Rüebe drü mau täglech), was natürlech ou isch gfiumet worde. Irgendeinisch hetsech du usegsteut, dass das Prinzässli e Video-Bloggerin isch gsi und dass üs um die 3000 vo ihrne Follower bi däm ganze Theater hei zuegluegt. Heya.

Friti: Ändlech wieder Gras schnide

Nach däm Horrortag isch eim e überwachsne, schlammige Wassergrabe wienes Paradies vorcho, ou wemer dr lieb läng Tag nume Pfludi umegschuflet hei. Immerhin hetsech das nid nach Ghirnwösch aagfüeut.

Samschti: Brot

Am Samschti ischs no um ds Fertigmache gange. Leider heimer zweni Houz gha für d’Fassade vom Hüsli ganz z’beände und eigentlech heimer de die Fassade no wöue bemale, bevor mer gö. Womer ufs Houz gwartet hei, si drum d’Froue schnäu i d’Mega-Mall ga kömerle.

Si heisech aber trotz verfüehrerische Importprodukt für Mäu, Anke u Honig entschiede. Im Houzofe uf dr Farm heisi du Brot bache - so richtigs Brot.

Am Aabe het d’Chöchi vor Farm es Abschiedsässe mit dämpftem Gmües, Fleisch u meh serviert. Ds Brot zum Dessert isch öppis vom Beste gsi, womer sit Aafang Reis gässe hei.

Sunntig: Zrugg ir Stadt

Mir heis du nid ganz chönne la sii und am Morge no ds Hüsli fertig aagmaut. Gäge Namitag heimernis ufe zwöistündig Wäg zrugg i d’Houptstadt vor Sichuan Provinz gmacht. Vom entschlöinigte Buurehofläbe zrugg i die 10 Millione Metropole. D’Stadt säuber hetnis rächt aagwiederet, beheimatet aber e Ufzuchtstation für nes ganz knuffigs Tier wo mir öich ir nächschte Gschicht dervo verzeue.