Teddybäre

“Müesst müglechscht früech am Morge ga”, hetme üs gseit. “Denn hets no kener angere Touris”, hetme üs gseit.

Dassme i Auerherrgottsfrüechi aber o no nüt gseht, das hetme üs nid gseit

Beröit heimers aber nid, wüu wo du dr Tag mau isch aabroche, hets Zmorge gä für di knuffige Peuzträger, wo d’Houptpersone vor dere Gschicht si.

U dassmer denn scho dert si gsi, hetsech definitiv glohnt. Wüu nam Zmorge nimmt d’Aktivität vo dene Kärline drastisch ab und die vo de Tourischte drastisch zue.

Chengdu Research Base of Giant Panda Breeding

Gründet 1987, isches das Forschigs- u Zuchtzentrum wome dem Nationalschatz und Symboltier vo China (und vom WWF) hiuft, nid uszstärbe. O die Tierart cha nid viu mit mönschlecher Infrastruktur aafa. Wassi bruucht, si dichti Bambuswäuder. U die si leider säute worde in China. Zudem het China e Zit lang d’Mode gha, Pandas bi Staatsbsüech aus Gschänk z’übergä. Das het de ghört wome het gmerkt, dass di Tierart langsam aber sicher verschwindet.

Hützutags gsehts dank Schutzbemüehige zum Glück wider chli besser us, aber es git nach wie vor nume um di 2000 wiud läbendi Pandabäre.

Ineffizienz in Bäreform

Me chas nid verneine, es isch e wahri Tatsach: dr Gross Panda isch definitiv eis vo de ineffizientischte Tier wos git uf dem Planet. Er schiist uf ds Überläbe vo de Sterchste u nimmt z’Läbe eifach totau easy. Wüsseschaftlech usdrückt, cha er nume 17% vor Nahrig woner ufnimmt o tatsächlech verwärte (angeri Tier chöi bis zu 80%) u unwüsseschaftlech usdrückt, isch er müglecherwiis das Tier, wo em Sinn vom Läbe tatsächlech isch uf d’Schlichi cho: Ässe u Schlafe. Würum dassi Liebi mache nid drzue zeue, chöimer o nid verstah (si hei schiins chli Müehi). Aber zrügg zum Essenzielle; wesi nid grad umelige u schlafe,