Irkutsk

Es isch dr 13.09. (ja, so wit hinger dri si mir mitem Blog ☺) und mir chöme in Irkutsk aa. Mir si cho für z’Blibe, emu für di nächschte zwe Wuche. Dr Houptgrund für dä läng Ufenthaut isch dr Baikalsee, dä isch so gross dasser d’Mönschheit 40 Jahr lang mit Trinkwasser chönnt versorge (nid mau dini Mueter isch so gross, mann). Bevor mir aber uf und dervo richtig See si, hei mir no chli d’Stadt erkundet und derbii houptsächlech bi de aute Houzhüser gfäischterlet. Das chöi mir sehr empfähle, drum hie e Sammlig vo de beste Fänschterläde in Irkutsk.

Heiligi Maria

E chli witer ab vom Schuss aber ou empfählenswärt isch d’Kazan Chiuche wo fasch chli usgseht wie die wo uf jedem Moskau-Föteli druff isch. Nur hets hie 100% weniger chinesischi Touriste. D’Restaurationsarbeite vom Dach dürfte sit Jahre in Gang sii, da si die blaue Decher mit chline Pinsle vo Hang am nachemale si gsi — kennemer ja vom Münster z’Bern.

Angara

Das isch kei russischi Heavy Metal Band, sondern es schwärs russischs Metauboot wome dermit cha dürs Iisch fahre — und es Museum. Vom Informationsghaut här müesstme das Museum wider ufe Grund vom Angara Fluss versänke (dert ischs scho mau haubers gsi, bevors es Museum isch worde). Würklech spannend isch nur dr Maschineruum, wome unghinderet vo Warnschilder (chame eh nid läse), Abschrankige und Museumswächter cha erkunde.

Dezember­revoluzger

Vor fasch 200 Jahr im Dezember hei in Russland höchi Militärs, Glehrti und Adlegi e Revolution aazettlet wo dr Zar het wöue stürze und e Demokratie het gforderet — und ds Monopol uf heissem Wii verbiete. Dr Zar het das gar nid luschtig gfunge und di Dekabrischte uf Sibirie i die berüchtigte Arbitslager (Gulag) verbannt. Dert heisi zersch mau unger nidrigschte Bedingige müesse Chole fördere, hei aber speter im Lager o Schueu gä und Läsige verastautet. Wosi si freigsproche worde, heisi erhäblech zur Entwicklig in Irkutsk biitreit und unger angerem Schuele bout und ou ungerrichtet. Gläbt heisi i dene ungloublech schnörkelig verzierte Houzhüser wome überau ir Stadt zwüsche karge Betonblöck fingt.

U süsch so?