Tiger Leaping Gorge

Nach dene Riisterasse heimernis - ou e chli wius ir Schwiz denn dr perfekt Winter isch gsi und mir zu üsem Übu Biuder us de Skiferie übercho hei - nach richtige Bärge gsehnt. Dr Südweste vo China isch i dene Belange viuversprächend, drum simer miteme Schnäuzug über Kunming (昆明) uf Dali (大理), i d’Yunnan Provinz übere gfahre.

Dali

Die inoffizielli Hippi-Houptstadt vo China isch Heimat vo zauriiche Expats, wo vor auem mit Restaurants und Hostels in China Fuess gfasset hei. Bi üs isch chli dr Iidruck entstange, dass d’Hippi-Kultur dr Zenit vo ihrer Blüetezit überschritte het - houptsächlech wiu die meischte Hippies womer troffe hei 70+ si gsi.

Was aber is Oug gstoche isch, si die unzählige Houzschnitzer, wo usserhaub vom südleche Stadtor, Lade a Lade, die wunderschönschte Houztürene gschnitzt hei. Üs isch ufgfaue, dass we in China eine Houztüre schnitzt, schnitze die nächschte 20 Läde ou die genau gliiche Houztüre. Das Phänomen tritt bi beliebige angere Produkt wie Stägegländer, farbigi Bongos oder ou kandierte Öpfle uf. Däm simer leider nie ufe Grund, sachdienlechi Hiiwise wäre aber wiukomme. Mir heinis zwüschezitlech druf geiniget am Kommunismus derfür d’Schuld z’gä.

Lijiang

Nördlech vo Dali ligt Lijiang (“Liziang”, 丽江) - ds Sprungbrätt für zum Tiger Leaping Gorge. D’Stadt säuber ligt uf 2416 m.ü.M., ir Ferni ragt ds Vorgebirge vom Himalaya i d’Höchi, d’Luft isch so klar wie niene in China und es isch wider bitter chaut.

Im Schlund vom Tiger

Vo Lijiang chame itze äbe es Bussli zum Aafang vo dere 2-Tägige Tiger Leaping Gorge Wanderig bueche. Ds Gepäck wird eim zum Hostel am Ändi vor Wanderig bracht. D’Wanderig füehrt dürs Tau hingerem Jadedrache-Schnee Bärg und isch mitere Töifi vo steuewiis 4 Kilometer vo Gipfu bis Fluss eine vo de töifschte Canyons vor Wäut (Superlative olé!). Dr Name git däm Tau e Legände us dr lokale Naxi Kultur. Gmäss dere Legände isch mau e Tiger übere eint Stei im Fluss uf die angeri Site übere gumpet.

28 Kurve

Me muess nid au zu wit louffe bisme scho zur erste berüehmt-berüchtigte Steu chunnt: de “28 Bends”. Vor dene üsserst stotzige Serpentine wird sogar im Reisefüehrer gwarnet — z’Lädeli wo diräkt vor dr erste Kurve chunnt, isch aber niene erwähnt. E findigi Gschäftsfrou bietet dert nämlech es ganz unerchannts Chrut feil, wo eim söu häufe, die 28 Kurve z’überstah:

Me schafft die 28 Kurve aber tatsächlech ou ohni Halluzinogen und für dobe d’Ussicht z’gniesse, söttme einigermasse zum Gsicht us gseh.

Vo denn aa fougt dr Wäg glücklecherwiis meh oder weniger dr Höhekurve dür kargs Gstrüpp, vereinzelti Bambuswäuder und git zwüsch inne immer wider d’Ussicht uf die majestätische Gipfle uf dr angere Tausite frei. Dr Fluss isch scho lenger usem Sichtfäud verschwunde und nur no aus entfernts Ruusche wahrnämbar.

Halfway Guesthouse

Ir Heufti chunnt ds Halfway Guesthouse. Uf dr Terrasse chame zumne Bierli dr Sunne zueluege wiesi die schroffe Feuse ines warms Aaberot tünkt, bevor si dr Tiger Leaping Gorge am Mond überlaht.

Denn wirds ou so richtig chaut u me verziehtsech schlöinigscht is Restaurant. Dert ischs zwar nid viu wermer, e Heizig oder zmingscht Isolation isch i dere Provinz nid vorhande. Touregruppene, wo äxtra nume fürs Ässe si hie ufe gfahre, wärmesech am Riisschnaps, mir hocke haut mit Chappe u Jagge am Tisch.

Zum Tiger Leaping Stone

Wo die Chinesischi Reisegruppe us de Näschter fürekroche isch, si mir scho lang wider am Wandere gsi. Dr Pfad isch zwar meischtens relativ eifach z’louffe, a gwüssne Steue wird me aber dra erinneret dassme i de chinesische Bärge ungerwägs isch.

Weme au dene Gfahre trotzt het, erreichtme dr Wäg wo zum Fluss abe füehrt. Dert chame dr sageumwobnig Stei ga besichtige. Wie mir das nid angers erwartet hei, steit am Aafang vo däm Wäg es Kassehüsli. Für einisch heimer aber gärn es Bigliet gchouft.

Ds Froueli vom Naxi Stamm und ihri Familie, wo dä Wäg offebar bout hei, hei ganzi Arbeit gleistet. Dr stotzig Abstieg isch mit Seili und Stägene gsicheret. Nach guet are Stung kraxle, erreichtme dr Talgrund und het däjenig Stei i sire glorriche Pracht diräkt vor de Füess. E Hängebrügg füehrt ufe Stei übere und chostet - wie chönnts ou angers sii - e Stutz Iitritt. Das ultimative Erläbnis heimernis aber gspart, wius 20 Meter witer obe im Fluss no e angere Stei het gha, wo weniger berüehmt isch, nüt chostet und ou im Fluss usse steit.

Wie wit dass Tiger würklech chöi gumpe und obsi sänkrächti Feuswäng chöi ueche chlättere überlömer itze mau ar Legände

Dermit wäremer ou scho am Ändi vo däm Tal und ou dere Gschicht aaglangt. Ir nächschte Gschicht verzeuemer nech vo wisse Wasserterrasse und fougeschwäre Fähler.

bis när