Zhangjiajie

Mitem Zug simer über Nacht ine angeri Wäut gfahre. Wos vorhär no ändlosi Fäuder vou Chinachöhli und Salat het gha, si itze Bambuswäuder und Paume gstange. Dr Näbu isch töif i de grüene Hügle ghanget und het d’Sicht nur uf die chline Orangefarme diräkt am Bahngleis freigä. Eifachi Houzhüttene mit Wäublächdach hei ds Landschaftsbiud dominiert, die graue triste Wohnblöck heimer zwüschezitlech hinger üs gla.

Dr Zug het im verrägnete Zhangjiajie (张家界, “Tschangdsiadsie”) ghaute, üses Zieu isch aber e Stung nördlech vo dert i de Hügle gläge: Wulingyuan (武陵源). In Wulingyuan isch nämlech eine vo de Iigäng zum sogenannte “Avatar National Park”. Dä Übername isch entstange, nachdäm dr James Cameron und sis Team sech hie für d’Kreation vor wundervoue Wäut vo Pandora hei la inspiriere. Das isch die mit de schwäbende Feuse im Sunnesystem Alpha Centauri.

Nachere churze Busfahrt düre Park hetsnis dünkt, schwäbendi Feuse sige gar nid so abwägig. Dr Sandstei isch hie so skurril erodiert, dass die Süüle eigentlech scho fasch müessti schwäbe, zum überhoupt chönne ufrächt blibe. Aus wär das nid scho erstuunlech gnue, wachse uf jedem no so chline Absätzli und uf de höchste Pfiler chrummi Tanndli — uf physikalischi Logik wird hie grosszügig verzichtet. Me chönnti Büecher füue mit poetische Schiuderige vo dem Ort, wüu mir aber z’fuu si für Büecher z’schribe heimer es paar Biuder gmacht. Ds Büecher schribe überlöh mir de Chinesische Schriftsteuer, wo sich sit hunderte vo Jahr hie lö la inspiriere.

Affe füetere verbote, dir Affe

Am Talgrund schlängletsech dr Fluss vor goldige Peitsche (金鞭流, Jinbianliu) gmächlech düre Schatte vo de bis zu 400 Meter höche Steilwäng. Hie unge erhaschtme nur hie und da e Blick uf die fantastische Süüle wo süsch hingerem dichte Blätterdach versteckt blibe. Die kantige Feuse und dr üppig Waud si derfür es Paradies für Makake. Leider heisech die aber a die zahlriiche Bsuecher gwöhnt und louffe meistens seeleruhig zwüsche ufgregte Reisegruppene desume, immer uf der Suechi nach Ässbarem. Trotz de zahlriiche Warnschilder, wo zmingscht uf Änglisch ds Füetere strickt verbiete, machesech teu Lüt e Spass drus, de Affe verschidnigi Snacks zuezschiesse und z’luege obsis ässe. Banane und Nüss gö ja no, aber verschlossnigi Seck Chips oder Täfeli si eifach nid in Ordnig. D’Affe si zwar gnue schlau die Sache uszpacke, aber vo Abfautrennig heisi kei Ahnig. Vo wäm hättesis ou söue lehre…

Wie sichs ghört, hei mir penibu uf Körperkontakt mit Affe verzichtet. Ganz im Gägesatz zur Susanne und am Julien, wos eifach nid hei chönne la sii und vo eim si gchratzet worde. Wäge akuter Tollwuetgfahr isch das veiechli es Theater mit Nach-Impfige und wärweisswas auem.

Die erschti Brügg ungerem Himu

Die natürlech entstandeni, ca. 20 Meter längi Brügg verbingt 400 Meter überem Bode e freistehendi Süüle mitem Hochplateau. Ds Überquere vo däm Feusboge isch nüt für schwachi Närve, bsungers weme mitem schwärwiegende Wüsse drüberschrittet, dass vor 20 Jahr dr unger Bitz erodiert und i d’Tiefi gstürzt isch. Aus wär das no nid gnue, wärde am Gländer no Glücksbringer in Form vo gravierte Sicherheitsschlössli und rote Bängeli fixiert. Was würd da d’Suva derzue säge? Wahrschiinlech anstatt Sicherheitsschlössli Läbesversicherige verchouffe.

Zur Sturmvilla

Eini vo de berüehmte Sehenswürdigkeite im westliche Teil vom Park isch d’Tianbo Mansion. Im Reisefüehrer und diversne Reisebrichte im Internet heimer gläse, es sigi für füllegi oder ängstlechi Lüt nid empfohle dert ueche z’chlättere. So ne Ort müessemer fasch gseh ha, heimernis gseit und hei aui Warnige i Wind gschlage.

Es isch nid wit ueche gange bises scho fasch het aagsteut. D’Stäge füehrt nämlech zwüsche zwöine Feusplatte düre wo so äng binang stöh, dassme het müesse dr Rucksack abzieh und sech sitwärts dürequetsche. Ufem Gipfu hets unerklärlecherwiis e chliini Siedlig. Weme die dürquert und hinge use luegt, gsehtme zur Tianbo Mansion übere. Ufere ca. 30 Meter entfernte Süüle steit uf dr flache, umzüünte Spitze e einzelne Sunneschirm. Nasewasser, itz no dert übere z’cho, dänktme, e Chatzesprung, e Sunntigsspaziergang, e Beckirandschwumm — bisme gseht dasses bevorme dr Sunneschirm erreicht, no 100 Meter bouzgredi z’Loch ab geit.

1001 Stägetritte bis zum Mac

Aus eini vo Chinas Houptattraktione isch dr Zhangjiajie Nationalpark mit füf A’s dotiert und somit aus Reisezieu uf dr Liste vo jedem reisefröidige Chines. D’Infrastruktur isch dämentsprächend hochentwicklet und für jedes Bedürfnis vom aaspruchsvoue Tourist isch gsorget. Während d’Toilettene wo dr Wäg süüme nach z’viu scharfem Ässe chöi praktisch sii, mache die pflasterete Wäge dr Wanderwäg düre Dschungu zure Outobahn und dr Ufstieg zum Hochplateau zure eher eitönige Fitnesslektion. Derfür ischs totau in Ordnig, dr Sunntigsusflug i d’Natur mit Stögelischue aazträtte. Am Ändi vom Ufstieg wartet schliesslech ou dr gäub M mit verfüehrerische lääre Kalorie uf aui Wiudnis-Abentüürer.

Über Touristefallene

Näbscht am Mac und übertüürete Kiosks hetme bimne Feuselift und diversne Gondeli d’Müglechkeit, hert verdients Gäud zum Fäischter use z’schiesse. Bsungers weh tuet das, weme d’Tageswanderig z’optimistisch planet het und me am viertu vor 6i no ufem Hochplateau obe isch und dr Park am 6i zuetuet und nach de sächse keiner Busse meh zum Iigang fahre und dä ziemlech wit wäg isch unds am sächsi dunku wird und wüu das gfürchig isch und das öppe gnue Gründ si, wirdme so zwunge, vom chostepflichtige Lift oder de Gondeli Gebruch z’mache. Me chasech de no iirede es sig ja no luschtig mau mitem Gondeli dür de Park ds schwäbe oder mitem Lift gredi dr Feus abe z’chessle. Weme aber mitem Gondeli um die sächse fahrt ischs scho dunku und me gseht nüt und dr Lift verschwindet nach hauber Fahrt (gfüeuhti 0.01 Sekunde) im Feus.

Wär ke Chopf het und d’Bei nid wott bruche, dä muess haut bläche.

Dr Park isch gross, aber d’Wäut isch chliin

Im Guesthouse in Ulan-Bator heimerse lehre kenne, z’Peking heimer mitne es Thanksgiving-Dinner gnosse und im Avatar Nationalpark heimerse nach gscheiterete Versüech sech z’träffe, zuefälligerwiis im hingerschte Egge vom Park aatroffe, nach dem si lätz usgstige, zrügg glüffe u när dr Aaschlussbus verpasst hei u mir genau i dene wenige Minute zrügg uf genau de Parkplatz si cho fürne angere Bus z’näh. D’Djem usem Wäuschland u dr Tyler us Amerika.